پرویز مشرف تے منموہن سنگھ وچکار مسئلہ کشمیر لئی گل بات



پاکستان دے گذریل فوجی حکمران ریٹائرڈ جنرل پرویز مشرف تے ہندوستان دے وزیر اعظم منموہن سنگھ وچکار مسئلہ کشمیر تے چار سالاں تیکر خفیہ مذاکرات ہوندے رہے تے مک مکا ہوون دے نیڑے سی پئی پاکستان وچ مشرف حکومت مک گئی۔ پاکستان تے ہندوستان وچکار انج دے مذاکرات جنہاں نوں ' بیک چینل ' دا ناں دتا گیا سی پاکستان ولوں گذریل فوجی صدر پرویز مشرف دے کالج دے دناں دے سنگی تے خاص بندے طارق عزیز تے ہندوستان ولوں ستندر لامبا دے وچکار لندن، دبئی تے بنکاک دے ہوٹلاں وچ بوہت ہی رازدار انداز وچ جاری رہے سی جنہاں نوں منموہن سنگھ تے پرویز مشرف دی پوری حمیت سی۔
ایہہ گل امریکی صحافی اسٹیو کول نے ہفت روزہ ' نیو یارکر ' دے نویں شمارے وچ کھولی ہے۔ اسٹیو کول دی کاہڈو رپورٹ وچ دوہواں ملکاں وچکار مسئلہ کشمیر دے حوالے نال سانگیاں دی تاریخ، ممبئی بمب دھاڑیاں دے پچھوکڑ وچ پاکستان ہندوستان سانگیاں وچ پاڑ، پاکستانی فوج تے آئی ایس آئی دے جہادی گروپاں دے وچکار سانگے ،تے گذریل فوجی حکمران جنرل پرویز مشرف دے دور حکومت وچ ہندوستان دے نال ہوون والی ایس ڈیل تے گل کیتی گئی ہے۔ جیہڑی اوہناں موجب ہوندیاں ہوندیاں رہ گئی۔
اسٹیو کول نے امریکی تے ہندوستانی اہلکاراں نال اپنی گل بات دے مڈھ تے ایہہ دعویٰ وی کیتا ہے جو پچھلے نومبر نوں ممبئی وچ ہوون والے دھاڑے اصل وچ آئی ایس آئی ولوں صدر آصف علی زرداری دی ہندوستان دے نال امن دیاں کوششاں دا جواب سی۔ اسٹیو کول موجب ہندوستانی اہلکار ممبئی دھاڑیاں نوں ' زرداری دا کارگل '' کہندے نیں۔ صحافی اسٹیو کول نے لکھیا ہے پئی امریکی تے ہندوستانی اہلکاراں دا کہنا ہے پئی آصف علی زرداری نوں اپنی سلامتی ولوں بڑی چنتا ہے تے ایہہ وی پئی بیک چینل مذاکرات دے کارن ہندوستانی وزیر اعظم منموہن سنگھ دی حکومت ممبئی دھاڑیاں دے جواب وچ ہندوستانی عوامی دبا دے مگروں وی پاکستان دے خلاف دھاڑیاں دی راہ نہ نپ سکی۔
اسٹیو کول نے اپنے مضمون وچ دسیا ہے پئی دو سال پہلوں پرویز مشرف نے اپنے راولپنڈی دے دفتر وچ سینئر جرنیلاں تے دفترخارجہ دے دو اہلکاراں دے نال کئی ملنیاں کیتیاں سی جنہاں وچ اوہ پاکستان تے ہندوستان وچکار ورہیاں تیکر جاری رہن والے بیک چینل یاں خفیہ مذاکرات نوں پرکھ دے رہے سی۔
امریکی صحافی موجب مذاکرات ادھے توں بوہتے کامیاب ہو چکے سی تے ہندوستان دے وزیر اعظم منموہن سنگھ پاکستان دا دورہ کرن والے سی کہ مشرف دیاں آمرانہ کاروائیاں دے کارن پاکستان دی سپریم کورٹ دے چیف جسٹس نوں ہٹائے جاون دے تت وچ مشرف دا ستارہ گردش وچ آوندا گیا تے ادھے توں بوہتی کامیابی تیکر اپڑن توں مگروں ایہہ خفیہ مذاکرات وچ ہی رہ گئے۔
اوہناں نے ایہہ وی گل کھولی پئی ایس معاہدے دے مسودے نوں نان پیپر ایگریمنٹ دا ناں دتا گیا سی جیہدے وچ مسئلہ کشمیر دے مستقل حل نوں لبھن دے مڈھلے اصول دے طور تے اپنایا گیا سی۔
اسٹیو کول نے اہناں لوکاں دے حوالے نال جنہاں نے ایہہ '' نان پیپر '' دستاویز ویکھی سی لکھیا ہے پئی ایہہ دو ہزار ست دے شروع وچ لکھیا گیا سی تے ایہدے ہیٹھ کمشنریاں نوں لائن آف کنٹرول دے دوہواں پاسے آزاد ہل جل تے وپار کرن دے اُچیچے حق دیون توں وکھ مارا ماری روکن دی صورت وچ دوہواں ملکاں دیاں سرحداں تے لگے فوجیاں دی گنتی وچ کمی تے لائن آف کنٹرول نوں اک بین الاقوامی سرحد دی پکھ توں مننا وی رلتی سی۔
صحافی موجب ایہہ پتہ نہیں لگ سکیا پئی ایس معاہدے تے عمل کرن لئی کنی معیاد رکھی گئی سی۔پر دستاویز توں جانکاری رکھن والے اک بندے نے ایہہ دس توں پندراں سال دسیا ہے۔ اسٹیو کول نے ہندوستانی تے پاکستانی عملداراں دے حوالے نال دسیا ہے پئی بھاویں اہناں مذاکرات لئی پاکستانی میڈیا، لوکائی تے ہندوستانی پارلیمان وچ راہ پدھری کرنی رہندی سی پر وزیر اعظم منموہن سنگھ پاکستان دا دورہ کرن والے سی جتھے سر کریک دے پاڑ دے تصفیے دا اعلان ہونا سی۔
اسٹیو کول نے مشرف حکومت دے گذریل وزیر خارجہ خورشید قصوری دے حوالے نال دسیا پئی جنرل پرویز مشرف نے فوجی جرنیلاں سنے اپنی حکومت دے سارے اہلکاراں نوں اہناں مذاکرات تے منا لیا سی تے اوہناں پاکستان دی ہندوستان ول پالیسی وچ ' یو ٹرن ' لیا ہویا سی۔
اسٹیو کول نے لکھیا ہے پئی مذاکرات نوں انٹر سروسز انٹیلی جنس یاں آئی ایس آئی دے اودوں دے جنرل اشفاق پرویز کیانی دی وی حمیت سی مذاکرات دے پچھوکڑ وچ ہندوستانی وزیر اعظم منموہن سنگھ نے کھل کھلا کے کہیا سی پئی میں اُس دیہاڑ دا سفنا ویکھ رہیا جدوں اپنی قومی پچھان برقرار رکھدیاں ہوئیاں اسیں ناشتہ امرتسر وچ کر رہے ہوواں گے تے دوپہر دا کھانا لہور وچ تے رات دی روٹی کابل وچ کھا رہے ہووواں گے۔'
پر اسٹیو کول لکھدے نیں جو ایہہ سارا کجھ سفنا ہی رہ گیا کیوں جو مشرف لئی پاکستان وچ حالات روز ہی بھیڑے توں بھیڑے ہوندے گئے تے اخیر اوہناں دی حکومت چلی گئی۔
جنرل مشرف نال اپنی ملنی بارے اسٹیو کول کہندے نیں پئی جدوں ایس ڈیل بارے اوہناں نوں پچھیا تے جواب سی ایہدے لئی دوہواں پاسیوں جرات دی لوڑ سی۔۔۔ اُچیچا ہندوستان ولوں ایس ہمت دی کمی سی۔۔۔ میں بس رعایتاں نہیں دے رہیا سی میں انڈیا توں رعایتاں لے وی رہیا


تبصرے

ایک تبصرہ شائع کریں

اس بلاگ سے مقبول پوسٹس

پنجابوں باہر تخلیق ہون والا پنجابی ادب

پنجابوں باہر لکھے گئے پنجابی ادب دی تاریخ اوتھوں شروع ہوندی اے جدوں پنجابیاں نے روزگار دی بھال وِچّ دوجیاں مُلکاں ولّ مونہہ کیتا سی ، یورپ ، امریکہ، کینیڈا ، آسٹریلیا، افریقا تے عرب ،مُلکاں وِچّ کھلریا پنجاب اپنی رنگا رنگی وِچّ مست رہیا ۔پاکستان تے بھارت نوں چھڈ کے ایس ویلے پنجابی ادب دے وڈے مرکز برطانیہ، کینیڈا، امریکا نیں ۔ اینہاں توں وکھ جرمنی ، مشرقی وسطیٰ( مڈل ایسٹ) تے یورپ دے کئی ہور ملک وی شامل نیں ۔ برطانیہ وِچّ پنجابی وڈی تعداد وِچّ 1947ء توں 1959ء دے سمے وِچّ آئے ۔ 1960ء ،1962ء وِچّ بھر پیا۔ 1963ء توں 1971ء دا عرصہ ٹِک ٹکا دا سما سی ۔1980ء توں مگرلا سماں دُوجی پِیڑھی دے پروان چڑھن دا سما سی۔ 1981ء دی مردم شماری موجب برطانیہ وِچّ کالیاں دی آبادی 22لکھ (4.1فیصد) سی ۔ اینہاں وِچّوں چار لکھ سٹھ ہزار بھارتی سن ۔ جنہاں وِچّوں 80فیصد توں ودّھ لوکاں دا تعلق بھارتی پنجاب نال سی ۔ پاکستان پنجابیاں دی گنتی ایس توں ڈِھیر ودّھ تے گھنیری رہی ۔ پنجابی مزدوری کر کے خوشحالی ودّھان واسطے ای برطانیہ آئے سن ۔ شروع وِچّ پاکستان تے بھارت توں برطانیہ آون والے اوہ لوک سن جنہاں کول یاں تاں زمین دی ...
مزید پڑھیں

پنجابی زبان دا نثری ادب

پنجابی ادب ول دھیان کیتیاں پتہ چل دا ہے کہ ایہدے وچ شعر دے نال نال نثر وِچ کوئی خاص کم نہیں ہوا پِچھے نظر مارو تاں سانوں نثر وچ اِکی دُکی کتاب ملدی ہے تے اوہ وی سِکھاں دی لکھی، تے سِکھاں ایہہ کتاباں گورمکھی لِپی وچ لکھیاں تے اَج وی اوہ گورمکھی اکھراں وچ کافی کم چھاپ رہے ہن۔اَج دا مسلمان پنجابی اپنی ماں بولی دے ادب دے متعلق کچھ نہیں جاندا، پَر ہُن کجھ لوکاں نے پنجابی ادب تے شعر دی تاریخ لکھی ہے۔ پنجابی زبان دے ادب تے شعر دی جِنی خدمت مسلمان نے کیتی ہے اینی خدمت کسی دوسری قوم نے نہیں کیتی۔ پر ایہہ بدقسمتی ہے کہ پچھلے کئی ورھیاں توں پڑھے لکھے مسلماناں نے اپنی ماں بولی ولوں منْہ موڑ لیا ہے، اردو دی خدمت وی کرنی چاہیدی ہے پر اپنی ماں بولی والوں بے پرواہی ٹھیک نہیں۔ جِنی خدمت پنجاب نے اردو تے فارسی دی کیتی ہے ایہدی مثال ملنا مشکل ہے ایہناں ہندو سیاست توں اردو نوں بچان لئی 1941ء دی مردم شماری وچ پچانویں فی صد پنجابی مسلماناں نے اپنی زبان اردو لکھائی۔ پنجاب وچ مولانا آزاد تے مولانا حالی توں پہلے اردو  دَا وجود نہیں سی۔ پاکستان دے ہر صوبے وچ اپنی اپنی زبان لکھی تے بولی جاندی ہے پر پ...
مزید پڑھیں

سرائیکی لوک قصے

 سرائیکی زبان اِچ وڈھان کیتے وی بے شُمار قِصے ملِدے ہِن ، اے قصے ، قصولی حضرات آپنے مخصوص انداز اِچ بیان کریندے ہِن ۔ انھاں قصاں اِچ حُسن تے عِشق مِلدا ھے ۔ جُستجو دا جذبہ پاتا ویندا ھے۔ آپنی دھرتی نال پیار ، اسلام تے بزرگانِ دین دی عظمت ، دلیر ی، مشکل چیزان داحصول تے سچ نال عشق داسبق مِلدا ھے ۔ ڈھیر سارے قصے تاریخی واقعات تے مبین ہِن ، جیویں پتن منارہ دی شہزادی دا قصہ ۔ پیغمبراں دے قصے وی وڈے شوق نال سنے تے سنائے ویندے ہِن ۔ کُجھ قصے مخصوص موقعاں تے تے سنائے ویندے ہِن ، تریجھی دے چندر کُوں منحوس سمجھا ویندا ھے ، اگر کوئی تریجھی دا چندر ڈیکھ گھِنے تاں بزرگ اُکوں ھِک خاص قصہ سنیندے ہِن تاکہ نحوست دا اثر ختم تھئی ونجے ۔ ڈھیر سارے قصے تاریخی واقعات تے مبین ہِن ، جیویں پتن منارہ دی شہزادی دا قصہ ۔ پیغمبراں دے قصے وی وڈے شوق نال سنے تے سنائے ویندے ہِن ۔ کُجھ قصے مخصوص موقعاں تے تے سنائے ویندے ہِن ، تریجھی دے چندر کُوں منحوس سمجھا ویندا ھے ، اگر کوئی تریجھی دا چندر ڈیکھ گھِنے تاں بزرگ اُکوں ھِک خاص قصہ سنیندے ہِن تاکہ نحوست دا اثر ختم تھئی ونجے ۔ نصراﷲخان ناصر لوک داستاناں تے لوک قص...
مزید پڑھیں